Võro Selts VKKF 78 28 750; 5649 2686 vorokiil@gmail.com
Siist näet postituisi Võro Seldsi kõgõ värskimpi tegemiisi kotsilõ!
Võro Selts VKKF luudi 12. märtekuu pääväl 1988. Kanepin. Seldsi nimes sai edimält Võro Keele ja Kultuuri Fond. 1997. aastagal tetti fond ümbre mittetulosaamisütisüses ja naas’ kandma parlast nimme.
Seldsi ülesannõ om tukõ ja hoita võro kiilt ni kultuuri kõgõ aoluulidsõ Võromaa pääl, minkast kõnõldas ka ku võro keele- ja kultuuriruumist.
2008. aastaga 31. mail peeti Võro liinan ja Kubija laululaval edimäst võrokeeline laulu- ja rahvapido Uma Pido, mink kõrraldust vidi Võro Selts. Tuust pääle kõrraldadas suuri umakeelitsit pitõ üle katõ vai kolmõ aastaga.
II Uma Pido peeti 29. mail 2010. aastagal Põlvan Indsikurmun, III 1. juunil 2013 Võrol, IV 28. mail 2016 Põlvan Indsikurmun, V 2. juunil 2018 Võrol ja VI Uma Pido 1. juunil 2024 Põlvan Indsikurmun.
1989. aastagast pääle peeti egä suvi aoluulidsõ Võromaa esi kotussin Kaika suvõülikuuli, kon kolmõ päävä joosul kullõldi võrokeelitsit loengit, kaeti umakeelist tiatrit, kontserte ni opati latsilõ võro kiilt.
2019. aastagast pääle peetäs egä suvi Kaika suvõülikooli matkapäivä, kon kullõldas määntsengi Vana-Võromaa kotussõn loengit, mindäs roitma ja kaias kultuuriprogrammi.
1989. aastagast pääle andas egä aastak vällä „Võro-Seto tähtraamatut“ – umakeelist kallendrit-almanahhi. Kallendrin omma kõrvuisi vahtsõnõ (Gregoriusõ) ja vana (Juliusõ) kallendri üten võro ja seto rahvakallendri tähtpäiviga. 2025. aastagast pääle om juttõ ja lugusit võro, seto ja mulgi rahvidõ esindejilt, et tuvva kokko vahtsõnõ looming ja teedüs lõunaeesti kultuuriruumi kottalõ.
